Habari

Kanisa Katoliki: Mapadre 25, Watawa na Wauguzi 60 Wamefariki Kutokana na 'Changamoto ya Upumuaji’

Kanisa hilo limeonya kuwa, kuendelea kufanya mzaha katika janga kama hilo ni hatari na kusisitiza kuwa elimu ya kutosha inapaswa kuendelea kutolewa kwa kila mwananchi

Katibu wa Baraza la Maaskofu Katoliki Tanzania, Padri Charles Kitima amesema kuwa ndani ya miezi miwili iliyopita zaidi ya mapadri 25, masista na manesi 60 na wenyeviti wawili wa Baraza la Walei wamefariki dunia kwa sababu mbalimbali ikiwemo changamoto ya upumuaji.

Katibu wa TEC ameyasema hayo leo hii kupitia mkutano na wanahabari na amesisitiza kuwa tishio la corona bado lipo Tanzania na Kanisa na ongezeko la vifo bado linaendelea kuripotiwa ikiwemo ndani ya Kanisa lenyewe

''Ndani ya miezi iliyopita Mapadri 25 wamepoteza maisha kwa matatizo ya kupumua. Masisita na manesi zaidi ya 60. Vifo vinaendelea, tuchukue tahadhari." Alinukuliwa

Kanisa hilo limeonya kuwa, kuendelea kufanya mzaha katika janga kama hilo ni hatari na kusisitiza kuwa elimu ya kutosha inapaswa kuendelea kutolewa kwa kila mwananchi.

Hii ni mara ya pili kwa mwaka huu Kanisa Katoliki nchini Tanzania kutoa tamko juu ya ugonjwa wa virusi vya corona nchini humo. Tamko la kwanza lilitolewa kwa njia ya waraka mwezi Januari ambapo Raisi wa TEC Askofu Gervaas Nyaisonga alitoa tahadhari juu ya wimbi jipya la maambukizi ya corona. Katika waraka huo kanisa lilisitiza Tanzania si kisiwa na kutaka tahadhari zote za kisayansi kuchukuliwa.

Onyo hilo la kanisa la katoliki linakuja huku Shirika la Afya Duniani "WHO" likiendelea kutoa wito kuitaka Tanzania kuchukua hatua zaidi kukabiliana na Covid-19.